ستین

دلوم تنگه وبیقراروم ستین
دیه حال وبالی نداروم ستین
نه زه دست مرفین وتل ودوا
زه دست زمونه خماروم ستین
تورهدی وبعدتواین زنده گی
آوی روزگار زهرماروم ستین
مو چی پیرمردی که وسته زه پا
ورهسسته چهر و هساروم ستین
توچی پازن هشت چال غزال
مو هم هشک اوید کوواروم ستین
موتازنده بیدوم نویدی کلوم
بمیروم ایای سرمزاروم ستین؟
ندونی چه دردی منه سینومه
سیاهه سیاه روزگاروم ستین
توچی برف سرسینه زرده کوه
مواماچی اور بهاروم ستین
توچی دارسوزی سرکوه منار
مو چنداربی برگ وباروم ستین
یوچندساله سهدوم زه داغت بیو
بگوکی ایای وادیاروم ستین
موچی لاله ای مینجقاباغ گل
زمونه ولی کرده خاروم ستین
خداحافظی نیگروم زت دیه
که تا یای سر ورگه پاروم ستین